Preseadis e Preseâts

Al è cun plasê che Us segnalìn lis iniziativis

“Flon-flon & musute”
dongje dal libri in
edizion furlane,

cumò ancje il video

une gnove colaborazion jenfri
la ARLeF e la associazion culturâl “El Tomât” di Buje 

Si visaiso dal libri “Flon Flon & Musute” che o vin fevelât cualchi timp indaûr? La version in lenghe furlane, publicade intal 2015 de
Associazion culturâl il Tomât cu la poie de ARLeF,
e jere stade curade de mestre Laura Nicoloso
partint dal origjinâl francês “Flon Flon et Musette”
di Elzbieta, vincidôr dal premi Andersen intal 1996.

La storie dai doi cuninuts amîs che a zuin simpri insiemi fin al dì
che e sclope la vuere e no puedin viodisi plui, a je deventade
cumò un biel video animât, a disposizion di fruts, gjenitôrs e insegnants.
Al è stât ideât di Leo Virgili che al à ancje componût e sunât lis musichis;
la vôs che e conte e je chê dal atôr Michele Polo e lis animazions
dai dissens origjinâi di Elzbieta a son par cure
dal regjist e videomaker Francesco Baita.

Il video - che al nas simpri de colaborazion tra la Associazion culturâl
“El Tomât” di Buje e la Agjenzie Regjonâl pe Lenghe Furlane
che lu à finanziât - si propon tant che un strument dedicât ae infanzie
par mantignî vîfs i valôrs de amicizie e de pâs
e ancje come supuart al insegnament de lenghe furlane.

Fracant chi o podês viodi il video

“piçulis angariis cuotidianis”

UN gnûf Concors di scriture
par curtis DRAMATURGJIIS o sogjets teatrâi
che a laran A FÂ PART DI un spetacul
de stagjon teatrâl 2016/2017

La Vettori Ultramondo soc. Coop. in associazion cu la Civiche Academie di Art Dramatiche “Nico Pepe” di Udin a àn bandît un gnûf concors par une curte dramaturgjie (curt teatrâl) o un sogjet curt che al à par argoment
un event, une ocasion, une  situazion paradossâl,
un incuintri/scuintri cul assurt.

I lavôrs judicâts bogns a laran a componi la dramaturgjie di un gnûf spetacul interpretât dai atôrs professioniscj Claudio De Maglio,
Claudio Mezzelani e Massimo Somaglino e che al larà
in sene inte prossime stagjon teatrâl.

I tescj e i sogjets a varan di vê un caratar comic e grotesc che al jentre intal gjenar “comedie” e a podaran jessi sedi par talian che par furlan.
Lis oparis a varan di rivâ ae segretarie de Civiche Academie
di Art Dramatiche “Nico Pepe", dentri dai 31 di Lui dal 2016.

Fracant chi o podês discjamà il bant complet