Preseadis e Preseâts

Al è cun plasê che Us segnalìn lis iniziativis

"Inovâl de
grafie de
lenghe furlane”

 Martars ai 19 di Lui dal 2016,
te sale Pasolini, sede de Regjon F-VJ a Udin.

Ai 15 di Lui dal 1986 e vignive fate buine dal Consei Provinciâl di Udin,
in cunvigne cu lis Provinciis di Gurize e Pordenon,
la propueste par une grafie unificade de lenghe furlane,
daspò deventade grafie uficiâl cu la L.R. 15/1996.
Martars ai 19 di Lui dal 2016, a 30 agns di chê date, i protagoniscj
di îr e di vuê a ricuardin chel impuartant travuart cu la celebrazion dal inovâl e la presentazion dal gnûf manuâl de grafie in version plurilengâl (furlan-talian-inglês). Te stesse zornade si podarà ancje discjamâ la version par spagnûl dal sît de ARLeF.

Al incuintri al sarà presint ancje il glotolic Xavier Lamuela, docent de Universitât di Girona, za Consulent de Provincie di Udin pe codificazion de grafie furlane, calcolât tant che il pari de grafie uficiâl de lenghe furlane.

Lis celebrazions  si tignaran aes 11.00, te sale Pasolini
sede de Regjon F-VJ in vie Sabbadini 31 a Udin.

Fracant chi o podês lei dut il program

“LA SALûT E FEVELE FURLAN"

La Cjarte dai Servizis de struture sanitarie
CORAM cumò ancje in lenghe furlane

Par risiervâ plui atenzion ae sô utence e inlidrisâsi ancjemò di plui
tal teritori, le CORAM di Udin, struture sanitarie convenzionade,
e à pensât di realizâ la sô
Cjarte dai Servizis ancje in lenghe furlane.

E je la prime volte che une operazion cussì e ven realizade di une
realtât privade e la ARLeF e à acetât di colaborâ cun plasê ae traduzion
di chest impuartant strument di comunicazion che al fâs cressi la cognossince de lenghe furlane e ancje la cualitât dai servizis che
a vegnin dâts fûr scurtant lis distancis tra operadôrs e utents.

Fracant chi o podês discjamà il depliant de Cjarte dai Servizis

“VIVA ONDE FURLANE"

Sabide ai 9 di Lui dal 2016

Une fieste di Musiche, culture e informazion
intal Parc Ex Tiro di Bagnarie

Al è rivât di gnûf il moment di Viva Onde Furlane, la biele fieste di musiche, ideis e creativitât che e permet ae “radio libare dai furlans” di cjatâsi dal vîf cul so public, ma ancje une fieste di autofinanziament par fâ svolâ une Radio che e met adun lenghe vive, informazion, culture e musiche.
La fieste conciert e je in program par sabide ai 9 di Lui a Bagnarie li dal Parc ex Tiro a volo, tacant des 9 di sere.

Un cartelon musicâl une vore siôr che al va dai Daisy Chain al tercet Vociniconsuete, dai Volvodrivers ai Carnicats fin ai LaipNessLess.
"Viva Onde Furlane" al regalarà al public la presince ancje di altris vôs “furlanis” e “fuartis”, tant che i Cjastrons, comunicatôrs creatîfs impegnâts cun Marco D’Agostini te realizazion de serie tv Friûl Revolution,
e i atôrs Federico Scridel e Michele Polo.

A sês ducj invidâts a partecipâ!

Fracant chi o podês sâve di plui