Preseadis e Preseâts

Al è cun plasê che Us segnalìn lis iniziativis

“pavee,
la magjIe dal furlan"

LA  GNOVE CAMPAGNE PROMOZIONÂL DE ARLEF

"La lenghe furlane e je vêr nudriment pal cerviel.
Sielç il furlan, sielzilu ancje a scuele".
Al è il sproc de impuartante campagne di sensibilizazion promovude de ARLeF  tant che continuazion e disvilup dal progjet
“Cressi cun plui lenghis” e indreçade ai gjenitôrs cun fruts in etât prescolâr e scolâr che si cjatin devant de sielte de lenghe o des lenghis di insegnâ in maniere direte ai propris fîs, o di avalêsi di chês intal percors scolastic.
 
La campagne inviade intai dîs passâts tes televisions locâl, sui social
e tes salis cinematografichis des provinciis di Udin, Pordenon e Gurize,
e à za palesât un grant sucès. Il spot video al conte cuntun lengaç cetant emozionâl la storie di une frute che e met dongje dutis lis peraulis che
e scolte, e che lis cataloghe intal so armâr segret.
Fin che un dì… la peraule “Pavee” e cambie l'ordin des robis…
 
La campagne e passarà ancje te cjarte stampade (setemanâi e cuotidians) e e larà indevant fin a Zenâr dal 2017. Cun di plui, cu la fin dal an,
intal periodi prime des iscrizions scolastichis al vignarà distribuît a dutis
lis fameis dal teritori furlanofon un depliant cun informazions
e indicazions pratichis pe adesion dal furlan a scuele.


Fracant chi o podês savê di plui

“suns europe.
doman la Scree uficiâl
dal festival”

aes 16.30, tal Teatro Nuovo Giovanni da Udine,
Il Friûl al vierç une altre volte lis puartis ae Europe

Sêso pronts par Suns Europe,
il Festival european des arts in lenghe minorizade?

Par trê dîs, a Udin, si podarà gjoldi de vitalitât culturâl e de ricjece espressive des produzions audiovisivis, leterariis e musicâls contemporaniis intes lenghis des comunitâts e des nazionalitâts minorizadis de Europe, cun autôrs di cine e di leterature, cun
musiciscj e operadôrs che a vegnin di areis diferentis dal continent.
 
Cun di plui si varà un spazi par cerçâ une altre particolaritât des
nestris comunitâts, chê leade ae produzion enogastronomiche.
 
Sabide ai 3 di Dicembar, no stait a pierdi la fieste di sieradure cun
ducj i artiscj e cu lis miôr produzions che a vignaran premiadis
inte serade event.

La jentrade a SunsEurope e je libare,
ma al è necessari ritirâ i biliets li di Radio Onde Furlane
(vie Volturno 29, Udin) e li de ARLeF
(vie Prefettura 13, Udin) o te bilietarie dal Teatri
(no plui di 6 biliets parom).

Fracant chi o podês lei il program complet

“FREE&ULLI …DUT A MANETE!”

LA GNOVE GOLAINE IN LENGHE FURLANE PAI FRUTS DAI 2 AI 5 AGNS

“…Moviti”, “Chi che o sin!”, “Lâ Ator” e “A plene panze”
a son i 4 titui de gnove divertente serie di librets cartonâts pai fruts
plui piçui, par lei, imparâ e ridi insiemi cuntune moscje
tant simpatiche e cuntun elegant crot inglês.
Insiemi a zuin, si divertissin, si movin, a fevelin par furlan
e, ogni tant, ancje un pôc par inglês.

Free&Ulli a saran presentâts a Dicembar in trê apontaments:
Vinars ai 9 di Dicembar, aes 17.30, te Librarie La Pecora Nera di Udin
Martars ai 13 di Dicembar, aes 19.00, te  Librarie W. Meister & Co.
di Sant Denêl
Sabide ai 17 di Dicembar, aes 17.00, li de Librarie Tarantola di Udin

Free&Ulli a son publicâts de cjase editore Futura Edizioni
cul contribût de ARLeF.
 

Fracant chi o podês savê di plui