Preseadis e Preseâts

Al è cun plasê che Us segnalìn lis iniziativis

“Maman!”
Ogni vinars su telefriuli

UNE TRASMISSION DUTE PAR FURLAN, PAI FRUTINS E PES FAMEIS

La Agjenzie Regjonâl pe Lenghe Furlane, adun cun Telefriuli, e presente "Maman!" la prime trasmission televisive par fruts dute par furlan.

Ogni vinars aes 17.45, ducj i frutins dai 3 ai 6 agns a puedin zuiâ e cjantâ cun Daria Miani, la presentadore de trasmission che e vîf intune cjasute plene di colôrs insiemi cun Vigji, il so gjatut.  

L’obietîf de trasmission al è chel di ufrî finalmentri ai fruts un moment ludic par furlan e ancje di informâ, sensibilizâ e dâ un supuart ai gjenitôrs,
ai nonos e ai educadôrs su la sielte dal plurilinguisim, te convinzion che imparâ plui lenghis za di piçui al ufrìs une cjarte in plui dal pont di viste cognitîf, metacognitîf e relazionâl.

"Maman!" e propon filastrocjis, zûcs, proverbis, contis e cjançons par furlan. In trasmission si alternin personaçs interessants dal panorame culturâl furlan: cjantants, insegnants, scritôrs, ilustratôrs, musiciscj, cogos
e ospits dai mistîrs plui diferents. Ognidun di lôr, insiemi cun Daria,
al fâs divertî il public cun senutis, dialics curiôs e mateçs.
In ogni pontade al è l’apontament pai plui picinins cuntun episodi dal carton animât "Omenuts" e tantis rubrichis: “A ogni frut il so librut”, li che si lei
e si presente un libri ilustrât par furlan, "99 Peraulis", dulà che grancj
e piçui a puedin imparâ gnovis peraulis no dome par furlan
ma ancje in altris lenghis, “Il Zûc” cu lis ilustrazions di Alc&Cè,
e "Cressi cun plui lenghis", indreçade ai gjenitôrs par capî miôr,
cul jutori dai esperts, i vantaçs dal plurilinguisim.

Lis trasmissions a laran indevant
ogni vinars dopomisdì aes 17.45 fin al mês di Jugn dal 2017.
Invezit lis replichis a son programadis pes zornadis di
martars aes 17.45 e di domenie aes 7.15.

Lis trasmissions si puedin cjatâ, cence il carton animât di Omenuts,
ancje su Youtube.



Fracant chi o podês savê di plui

lei online

“L'INSEGNAMENT DAL FURLAN
A SCUELE AL RAPRESENTE
UNE  OPORTUNITÂT”

LA ARLEF E PROMÔF UNE CAMPAGNE IMPUARTANTE DI INFORMAZION
PAR SUPUARTÂ LA SIELTE CUSSIENTE DAL PLURILINGUISIM
IN ETÂT SCOLÂR

“Pavee. La magjie dal furlan” al è il sproc de impuartante campagne
di sensibilizazion realizade de ARLeF e indreçade ai gjenitôrs par motivâju a sielzi l'insegnament de marilenghe pai propris fîs iscrits tai Istitûts Comprensîfs e tes scuelis paritariis dal teritori furlanofon.
Il progjet al gjolt dal supuart dal Assessorât regjonâl pe Istruzion
e dal Ufici Scolastic Regjonâl.  

Il target de campagne al è rapresentât di gjenitôrs cun fruts in etât prescolâr e scolâr che si cjatin devant de sielte de lenghe o des lenghis
di insegnâ in maniere direte ai propris fîs, o di avalêsi di chês intal percors scolastic. Une sielte a vuê condividude di 31.526 arlêfs des scuelis pe infanzie e des primariis des provinciis di Udin, Gurize e Pordenon, vâl a dî il 73% dal numar totâl des iscrizions (ben plui dal 80% te provincie di Udin).

Pe setemane che e ven, cuant che a vierzaran lis scuelis, a saran distribuidis ai fruts plui di 60.000 copiis di un depliant bilengâl (furlan - talian), cun tantis informazions sui vantaçs e su lis oportunitâts ufiertis
dal insegnament e dal aprendiment de lenghe furlane intes scuelis.
Il depliant al è une vere e proprie vuide pai gjenitôrs - finalizade a fugâ cualchi prejudizi e a disvilupâ une cussience plui fuarte su la utilitât formative di cheste sielte - e un supuart util pai insegnants e pai dirigjents che tal lôr rûl a son clamâts a dâ indicazions claris e precisis
sul argoment a dute la popolazion scolastiche.

La campagne informative “Pavee. La magjie dal furlan” - realizade di Anthes (Virginia Ruano e Mauro Ciani) - e il spot video di Kinoglaz studio (Valentina Biz e Juri Stefanutti) a son stâts inviâts za tal mês di Novembar sui social network e intes salis cinematografichis des provinciis di Udin, Pordenon e Gurize cu la proiezion di un spot cuntun lengaç emozionâl fuart, che si podarà viodi fin ae fin di Zenâr. Inte campagne informative
a son stadis cjapadis dentri ancje lis emitentis televisivis locâls
e la cjarte stampade (setemanâi e cuotidians).  

«O sin cierts che la promozion e la difusion dal plurilinguisim in etât scolâr
- e à dîte la Assessore regjonâl al Lavôr, Formazion e Istruzion
Loredana Panariti - a fasin part di chel pachet di buinis pratichis formativis
che la nestre scuele e à di proponi e di aplicâ. Il plurilinguisim al puarte dome vantaçs e nissun disavantaç e cumò, inte nestre regjon, la oportunitât di cressi bilengâi e je a puartade di man».



Fracant chi o podês savê di plui