Preseadis e Preseâts

Al è cun plasê che Us segnalìn lis iniziativis

“in arlef,
il servizi civîl
al fevele furlan”

doi puescj par zovins volontaris
domandis dentri dai 26 di jugn

Si rinove la pussibilitât di fâ il servizi civîl in ARLeF. I zovins in servizi
a saran impegnâts in ativitâts istituzionâls di promozion
de lenghe furlane e a colaboraran cun chei altris components
dal grup di vore de ARLeF.

A puedin partecipâ ae selezion i citadins europeans, oms e feminis
che al moment de presentazion de domande
a vedin finît 18 agns e no vedin passât i 28.
La sede dal servizi e sarà chê de ARLeF, a Udin, e la durade di 12 mês.
Ai volontaris ur spiete un assegn mensîl di 433,80 euros al net.

La domande di partecipazion aes selezions e va indreçade ae ARLeF
e e à di rivâ dentri des 14.00 dai 26 di Jugn dal 2017.

La domande si à di inviâle vie PEC ae direzion arlef@certgov.fvg.it
vie racomandade A/R, o pûr si pues consegnâle a man.



Fracant chi, o podês discjamâ la documentazion complete

“SUns europe 2017”

la anteprime estive

Vinars ai 9 di Jugn, aes 20.45, in Cort Morpurgo a Udin, no stait a pierdi une anteprime di SUNS Europe,
il festival des arts performativis in lenghe minoritarie.

A saran ospits de serade la musiciste e cjantante Gwenno di Cardiff, che
e esprim la sô art par Cornic o par Galês, e Elsa Martin e Marco Bianchi che, cul progjet VERsO, a ufriran al public un spetacul di musiche, imagjins e narazion par presentâ il cd vERsO, là che la cjantautore e esprim
il mont furlan di vuê tant che sintesi fra tradizion e inovazion.

Te serade al vignarà presentât ancje il bant pe edizion 2017 dal festival promovût de Regjon F-VJ e de ARLeF.

O sin braurôs di dîus che, ai 18 di Mai, il festival al è stât presentât al Intergroup for Traditional Minorities, National Communities and Languages dal Parlament European di Strasburc cul fin di cjatâ gnûfs partners e di slargjâ la rêt des colaborazions. La presentazion di SUNS Europe intun contest cussì prestigjôs e à otignût un grant interès
di bande dai presints.

Fracant chi, o podês lei plui informazions

“tastiere furlane semplice”

une gnove version par windows

In plui de gnove APP dal GDBtf, tra i gnûfs struments informatics volûts de ARLeF, e je la Tastiere Furlane Semplice che e permet di scrivi
svelts e corets in lenghe furlane cui acents e i caratars juscj.

Midiant di une cumbinazion di tascj une vore semplice, nol coventarà doprâ il codiç ASCII o inserî ogni volte tal test il simbul che al covente.
Doprâle nol è complicât!

Cun di plui, cheste gnove version e je adate par Windows XP o superiôr.



Fracant chi, o podês discjamâ la Tastiere Furlane Semplice

"emozions furlanis
in viaç pal teritori”

Proclamâts i fruts vincidôrs dal concors

Il prin di Jugn, te sede de Provincie di Udin, e je stade fate la cerimonie di premiazion dal concors a premis "Emozions furlanis in viaç pal teritori", inmaneât dal Ufici Scolastic Regjonâl, adun cun ARLeF e Provincie
di Udin, in ocasion de Fieste de Patrie dal Friûl.

Chest an, e je stade une grande partecipazion: vincj scuelis e centenârs di fruts a àn contât il Friûl midiant di tescj, dissens, videos e filastrocjis.

I vincidôrs a son: pe sezion infanzie, i fruts de scuele "Antony D. Liberale" di Rualis cul progjet "Pipins e fruçonuts"; pe sezion primarie,
i fruts de scuele "G. Torre" di Caprive cul progjet "In viaç cun Zuan"
e pes mediis, i fruts de scuele "Pio Paschini" di Aquilee
cul progjet "Il nestri paîs".

Il concors, viert aes scuelis de infanzie, primariis e secondariis di prin grât des provinciis di Udin, Pordenon e Gurize, rivât ae seste edizion,
al à l'obietîf di valorizâ e di promovi il patrimoni storic, artistic,
culturâl e naturalistic.

Par ogni categorie dal concors, a son stâts diviers progjets che a àn meretât une segnalazion pe cualitât dal lavôr.



Fracant chi, o podês savênt di plui