Preseadis e Preseâts

Al è cun plasê che Us segnalìn lis iniziativis

“DocuscuelE. UN gnûf sît
e IL Festival dedicât ae leterature pe infanzie
in marilenghe”

Prin complean tal segn des novitâts

Lunis ai 20 di Novembar, a Udin, inte sede de Filologjiche - a Palaç Mantica - che e da acet al archivi dai progjets e des esperiencis di valence didatiche, al sarà presentât il gnûf sît internet di Docuscuele,
il Centri di documentazion, ricercje e sperimentazion didatiche, nassût
di une intese tra la Agjenzie Regjonâl pe Lenghe Furlane e la Societât Filologjiche Furlane, cu la poie de Regjon autonome Friûl-Vignesie Julie.  L'avigniment al è ricognossût tant che
ativitât formative par insegnants.

Altris apontaments a son previodûts joibe ai 23 a Lucinîs; martars ai
28 a S. Denêl; joibe ai 30 a Cividât e infin martars ai 5 di Dicembar
a S. Zorç di Noiâr. Intai incuintris, ducj previodûts pes 17 par vignî incuintri aes dibisugnis dai insegnants, si darà cont des potenzialitâts dal sît, ilustrant lis oportunitâts di acès ai materiâi e ai progjets za metûts
in vore intes aulis dal Friûl, che a puedin deventâ un model pal insegnament plurilengâl inte scuele.

La ativitât di Docuscuele si môf ancje in direzion dal mont de
ilustrazion e de editorie pe infanzie e par fruts in lenghe furlane.
Simpri tacant di lunis ai 20 fin ai 30 di Novembar, di fat, si davuelzarà “Fruts!”, il gnûf Festival de leterature pe infanzie in lenghe furlane.

Dôs a son lis tipologjiis di ativitât. La prime e je l'aprofondiment di un
fra i libris ilustrâts plui significatîfs dal panorame internazionâl,
“Il puint dai fruts”, scrit di Max Bolliger, autôr e
pedagogjist svuizar, e ilustrât di Štěpàn Zavřel.
A contâ la flabe a saran doi atôrs de compagnie Teatro Positivo.
La propueste e je indreçade aes scuelis de infanzie e de primarie (su prenotazion, di lunis ai 20 a vinars ai 24 di Novembar, cun doi turnis
ogni matine) e cuntun apontament dedicât aes fameis, sabide ai 25
di Novembar (simpri di matine, su prenotazion). I incuintris si fasin te
sede di Docuscuele (li de Filologjiche a Udin, in vie Manin 18).

Sul teritori si davuelzaran invezit i laboratoris creatîfs, realizâts in colaborazion cu lis bibliotechis dal teritori furlanofon. Si podarà cognossi cussì la produzion grafiche e librarie di cuatri fra i ilustradôrs furlans plui impuartants: Luigino Peressini, il mâc des mapis, Federica Pagnucco,
la regjine dai colôrs, Barbara Jelenkovich, la viazadore intal timp,
e Emanuele Bertossi, il poete de nêf. Lôr si metaran in zûc cui fruts in orari scolastic, e cui insegnants - des 17 aes 19 - cun incuintris di pueste valits pal increditament formatîf daûr des liniis vuide MIUR 2016-2019.

Dutis lis ativitâts a son a jentrade libare.
Par informazions e prenotazions, inviâ une email a info@scuelefurlane.it
o clamâ il n. 0432.501598 (int. 5), di lunis a vinars, des 9:00 aes 13:00.

Fracant chi o podês savê di plui