Preseadis e Preseâts

Al è cun plasê che Us segnalìn lis iniziativis

“al torne Maman!”

dai 12 di zenâr, la seconde stagjon dal program
par fruts in lenghe furlane

Dopo il sucès de prime stagjon, di vinars ai 12 di Zenâr al torne Maman!
il program televisîf dut par furlan dedicât ai fruts dal Friûl.

Risultât di une coproduzion de ARLeF -
Agjenzie Regjonâl pe Lenghe Furlane e di TELEFRIULI,
par mieç di divertiment, narazion e zûc Maman! al met in contat  i fruts
cul plurilinguisim e cui vantaçs cognitîfs comprovâts che a derivin
dal ûs di plui lenghis za de etât plui tenare.

 Condutoris e coautoris de gnove stagjon televisive a son
Daria Miani e Chiara Donada.
Insiemi a intratignaran i fruts cun zûcs, cjançons, curiositâts
e contis une vore bielis.

Tra lis novitâts di cheste stagjon e je ancje la presince di Siôr Timp, interpretât dal atôr Manuel Buttus, personaç stravagant che al puartarà sorpresis in ogni pontade. Lis aventuris di Tui e Tuie, doi tuiuts afetuôs ma un pôc pastrocjons, a animaran invezit il spazi dai cartons animâts.

Maman! al larà in onde fin al mês di Jugn dal 2018,
ducj i vinars aes 17.45
cun replichis il miercus aes 17.45 e la domenie aes 7.00.
Ducj i fruts a son invidâts a deventâ protagoniscj de trasmission inviant ae direzion email maman@tvstar.com  o al numar 333 7202814 un video (regjistrât tignint il celulâr in orizontâl) cuntun messaç, une cjançon,
une filastrocje o une barzelete par furlan, che al vignarà
mandât in onde dilunc de programazion.

Fracant chi o podês viodi lis pontadis de prime serie di Maman!

“rush"
Progjet formatîf
european

martars ai 16 di zenâr dal 2018
La cunvigne di Presentazion

La cunvigne di presentazion dal progjet european RUSH dal titul “Modelli di tutela e pratiche di successo per l'insegnamento delle lingue minoritarie in Europa” si davuelzarà
martars ai 16 di Zenâr dal 2018, li dal Palazzo De Nordis di Cividât.
A saran presints diviers relatôrs esperts e impuartants.

Rush al è un progjet internazionâl che si disvilupe tal ambit di Erasmus +, dedicât ae istruzion, formazion, zoventût e sport.
In cheste suaze, al vûl contribuî a definî i titui culturâi, professionâi e sientifics ricognossûts al docent plurilengâl in Europe e a creâ modui formatîfs trasversâi aes competencis clâf.

La impuartance di Rush e je tal valorizâ al miôr, e intune
dimension plui largje, l'inseriment des lenghis minoritariis
intun sisteme didatic plurilengâl cussì
come al sucêt in tantis altris bandis de Europe.

Il progjet, di durade trienâl, al cjape dentri pe prime volte Italie (Friûl-Vignesie Julie), Spagne (Galizie) e Cravuazie. Dongje de ARLeF (Agjenzie Regjonâl pe Lenghe Furlane), che e à lavorât a fuart te fase di presentazion de candidature, a Rush a partecipin l'Istitût Omnicomprensîf Convit Nazionâl “Paolo Diacono” di Cividât, che al è a cjâf dal progjet; il Comun di Cividât (ent che al organize la cunvigne); lis dôs scuelis galizianis Salvaterra di Miño e Carlos Caseras, in colaborazion cu la Dirección Xeral di Educación; la scuele Benussi di Rovigno e la Union Taliane (Cravuazie).

La partecipazion e je vierte a ducj i interessâts fin che si esaurissin
i puescj disponibii. Par iscrivisi, doprâ chest link: 
www.cnpd.it/rush

.
Fracant chi o podês lei il program complet