Preseadis e Preseâts

Al è cun plasê che Us segnalìn lis iniziativis

wordpress
par furlan

Arlef e ensoul pe gjeolocalizazion
dal program in lenghe furlane

Lis lenghis dopradis par gjeolocalizâ WordPress a son, di vuê,173:
di fat, in graciis di un grant lavôr fat de ARLeF e di ENSOUL,
e je disponibile la version par furlan dal program di progjetazion
e di costruzion di sîts web plui cognossût e doprât.

Il lavôr, che al domandave competencis specifichis
sedi linguistichis che tecnologjichis, al à compuartât plui di un an di lavôr, cu la traduzion di 6.287 frasis. Il lavôr di traduzion al è lât daûr
des liniis vuide internazionâls, conservant il lengaç informâl
dal backend di WordPress.

La version furlane di WordPress e je simbul di une evoluzion necessarie dai struments linguistics che a àn di tignî il pas
cu lis dibisugnis di une lenghe che e à di jessi doprade,
inte cuotidianitât, in maniere naturâl e eficace in ducj i contescj.

Si trate, duncje, di un altri dispositîf che al semplificarà
la realizazion di sîts internet in lenghe furlane,
facilitant la presince dal furlan sul web.

Fracant chi o podês acedi al program

videotutorials
informatics

trê gnûfs video che a sclarissin l'ûs dai struments
par scrivi in lenghe furlane

Il sît de ARLeF, te sô sezion dedicade ai struments pe lenghe,
si insiore di trê gnûfs videotutorials che a ilustrin l'ûs di struments informatics doprâts par scrivi in maniere corete in lenghe furlane.

Intal specific, i videotutorials, che a son in lenghe furlane
(cun sottitui par talian) e a durin dai 5 ai 8 minûts ognidun,
a sclarissin in maniere semplice cemût doprâ ben il
Grant Dizionari Bilengâl talian - furlan e la relative App,
il Coretôr Ortografic Furlan e la Tastiere Furlane Semplice.

I videotutorials fats de Agjenzie cu la colaborazion di Intech srl,
a son stâts presentâts îr tal Palaç de Regjon a Udin,
adun cul program WordPress par furlan e a vuelin jessi un mieç
par facilitâ l'ûs des tecnologjiis che o vin a disposizion te nestre cuotidianitât e che si evolvin cu la societât e la lenghe.

Fracant chi o podês cjalâ i videotutorials